Қала әкімі көпбалалы аналарды құттықтап, олардың ел болашағын қалыптастырудағы рөлінің ерекше екенін атап өтті. Сондай-ақ ұрпақ тәрбиесіне бар өмірін арнаған аналардың еңбегі демографиялық тұрақтылықтың, отбасылық береке мен қоғамдағы ұрпақтар сабақтастығының негізі екенін жеткізді.Айта кетейік, бүгінде Кентау қаласында 4 614 көпбалалы ана бар. Оның ішінде 533 ана «Алтын алқа», 1 169 ана «Күміс алқа» иегері. Сонымен қатар 19 ана «Ана даңқы» орденінің І және ІІ дәрежесімен, 38 ана «Батыр ана» атағымен марапатталған.
Тақырыпқа орай айта кетсек, 2026 жылғы 1 қаңтардан бастап айлық есептік көрсеткіштің (АЕК) 4 325 теңгеге дейін өсуіне байланысты балалы отбасыларға берілетін мемлекеттік жәрдемақылар мен әлеуметтік төлемдер 10%-ға артты. Көпбалалы отбасы мәртебесін алу үшін отбасында бірге тұратын 4 және одан да көп кәмелетке толмаған бала болуы қажет. Сондай-ақ 23 жасқа дейінгі күндізгі оқу нысанында білім алатын студент балалар есепке алынады. Бұл жәрдемақы отбасының табысына қарамастан тағайындалады.
2026 жылғы ай сайынғы жәрдемақы мөлшері:
???? 4 балаға – 69 330 теңге
???? 5 балаға – 86 673 теңге
???? 6 балаға – 104 016 теңге
???? 7 балаға – 121 360 теңге
???? 8 және одан көп балаға – әр балаға 17 300 теңге
Наградталған аналарға берілетін жәрдемақы:
«Күміс алқа» иегерлеріне – 27 680 теңге;
«Алтын алқа», «Батыр ана» атағын алғандарға, сондай-ақ I және II дәрежелі «Ана даңқы» ордендерімен марапатталғандарға – 32 005 теңге.
Жәрдемақыны қалай рәсімдеуге болады?
Мемлекеттік қызмет тегін көрсетіледі және бірнеше тәсілмен рәсімдеуге болады:
1️. eGov.kz электрондық үкімет порталы арқылы – қарау мерзімі 4 жұмыс күніне дейін;
2️.«Азаматтарға арналған үкімет» мемлекеттік корпорациясы (ХҚКО) арқылы – 7 жұмыс күніне дейін;
3️.Проактивті қызмет арқылы – бала туғаннан кейін тіркелген телефон нөміріне келетін SMS хабарлама бойынша;
4️.Екінші деңгейлі банктердің мобильді қосымшалары арқылы.
Көпбалалы отбасыларға көрсетілетін мемлекеттік қолдау шаралары туралы толық ақпаратты ресми ақпарат көздерінен алуға болады.
«WWW.AQ-QARA.KZ» - ақпарат