«Баршаңызға мәлім, елімізде жарияланған төтенше жағдайға байланысты, Сіздерден өз үй-жайларыңыздан мүмкіндігінше шықпауды өтінеміз. Азық-түлік немесе дәрі-дәрмек алу сынды аса қажеттілік болмаса, сауда орындары мен базарларға, саябақтарға, ойын алаңшаларына баруды және туған-туыстардың, дос-жарандардың үйлеріне қыдыруды уақытша доғаруды сұраймыз». Бұл туралы Шымкент қаласының төтенше жағдай штабы мәлімдеді.
Шымкент қаласы әкімдігі шаһар тұрғындарына коронавирус инфекциясының таралуына жол бермеу мақсатында 2020 жылдың 28 наурызында түнгі сағат 00:00-ден бастап қосымша шектеу шаралары енгізілгенін ескертті.
Әлемді алаңдатып отырған коронавирус індетіне байланысты Шымкент қаласында сақтық шаралары барынша күшейтілді. Қазіргі таңда қала әкімдігінде жедел штаб құрылып, қауіпті инфекцияның алдын алу үшін арнайы кешенді іс-шаралар әзірленді.
Түркістан облысы Түлкібас ауданындағы «Шақпақ» бекетінде бүгін екі мыңға жуық азамат блок-постта дәрігерлер тексеруінен өтті.
Қалаға кіріп-шығатын жолдарға блок-бекеттер қойылды. Ал қауіпті вирус анықталған екі азамат – жұқпалы аурулар ауруханасында. Онымен қатынаста болған адамдар карантинге жатқызылған. Нұр-Сұлтаннан бес күн бұрын келген бұл науқастың тұратын ауылы да толық оқшауланды. Және автобуста бірге келген 16 адамның 6-ы табылды. Қалған 10-ы іздестірілуде.
«Қалаларымыздың негізгі көшелерінде маскалар азаматтарға тегін таратылуы тиіс». Осылай деп Президент Қасым-Жомарт Тоқаев еліміздегі төтенше жағдайға байланысты ұсыныс айтқан болатын. Осы бастамаға Шымкенттегі «Mega Pharma» компаниясы алғашқылардың бірі болып қолдау білдірді. Кәсіпорын өкілдері еріктілермен бірге қала тұрғындарына тегін бетперде таратты.
Бұған дейін еліміздің үшінші мегаполисінде коронавирус жұқтырудың 2 фактісі анықталса, республика бойынша жалпы көрсеткіш 109-ға жетті. Қауіпті індеттің алдын алу үшін төтенше жағдай жарияланып, қазіргі таңда күнделікті тыныс-тіршілік барысында аса қажеттілік туындамаса, тұрғындарға үйінен шықпауға кеңес беріліп жатыр.
Шымкент қаласынан індеттің таралуына жол бермеу, тұрғындардың қауіпсіздігін қамтамасыз ету мақсатында қалааралық жолдарға қатынайтын автобустар тоқтатылып, автобекеттің жұмысы уақытша тоқтатылды.