– Жоба жүзеге асса мыңдаған жаңа жұмыс орны ашылып, жұрт жыл он екі ай көкөніспен қамтылатын болады, - деді қалалық ауыл шаруашылығы басқармасының басшысы Асқар Қаныбеков. Ал логистикалық аймақта қолға алынған алғашқы инвеститциялық жобаның құны 2,3 млрд тг құрайды. Мемлекеттік-жекеменшік әріптестік аясында «Taza onim» шаруа қожалығы 9 гектар жерге жылыжай салып жатыр. Оның 3 гектары бітіп, шаруалар 370 тонна өнім алды. Көкөніс толықтай жергілікті нарыққа сатылған.Қалған 6 гектары жыл соңына дейін бітеді. Қожалықта жергілікті 30 адам тұрақты және 20 адамды ауыспалы жұмыс орнымен қамтылған. Кешеннің жанынан жұмысшылар үшін арнайы жатақхана да салынуда.Қожалық құрылтайшысы Арман Бахытұлының айтуынша, кешенде қиярдың «Тристан», «Танто», «Мева» сорттары егіліпті. Алдағы уақытта Қазақстанның солтүстік, батыс аймақтарымен келіссөздер жүргізіліп, өнімді жөнелту күтілуде.

Сонымен қатар, аталған бағыттағы жылыжай өнімдерін бір орталыққа бірігу арқылы өзара кооперация құрып, тауарлы партия қалыптастырылып, делдалдардың қатысуынсыз Ресейге тікелей экспорттау жоспарлануда. Қала әкімі Мұрат Дүйсенбекұлы шаруашылық өндірген өнімді жергілікті базарларға тікелей жеткізіп беру жағын қарастыруды тапсырды. Жылыжайдан шыққан өнімнің келісі 400 теңгеден босатылуда. Бұл отандық өнімінің сатылу құнын реттеп, жергілікті халықтың көкөністі делдалсыз сатып алуына мүмкіндік береді.Айта кетейік, Шымкентте жылыжай көлемі 183 гектарды құрайды. Оның 53 гектары өнеркәсіптік. Қалада бұдан бөлек тағы 25 гектар өндірістік жылыжай құрылысы жыл соңына дейін іске қосылмақ.

«AQ-QARA.KZ» - ақпарат»