Отырар: Көксарайда Республика күніне орай мерекелік концерт өтті
Отырар ауданына қарасты Көксарай ауылдық мәдениет үйінде 25 қазан —Република күніне орай «Менің Отаным —Қазақстан» атты мерекелік концерт өткізілді.
ШЫМКЕНТТІКТЕР РЕСПУБЛИКА КҮНІН ТОЙЛАУДЫ БАСТАП КЕТТІ
Шымкенттегі “Көрме” орталығында Ұлттық мерекеге арналған салтанатты шара өтті. Оған шаһар басшысы М. Әйтенов, қалалық мәслихат депутаттары, құқық қорғау орган басшылары мен қызметкерлері, сот, қоғам қайраткерлері, зиялы қауым өкілдері мен БАҚ қатысты.
Бұл жолғы ісшара бұрынғысынан өзгерек. Алаштың айбынын асқақтатып, мерейін үстем ететін арнайы бейнероликтен басталды. “Егемен елдің” өткені мен келешегі сараланып, Ұлы дала халқының дархандығы мен дара көңілі көрсетілді. “Сазген сазы” фолькорлық-этнографиялық ансамблі “Бақтыбайдың күйімен” қазақтың сыры мен сазын әуелетіп жеткізді. Бұдан соң қала әкімі сөз алып, барша жұртты тарихи датамен құттықтады.
Республика күні - туған еліміздің егемендігі бастау алған күн. 1990 жылдың 25 қазанында Қазақ Кеңестік Социалистік Республикасының Жоғарғы кеңесі мемлекеттік егемендік туралы Декларация қабылдады. Дәл осы күні Қазақстанның тәуелсіз мемлекет ретіндегі саяси-құқықтық негіздері жарияланды.
Аттай 13 жылдан соң, дәл биыл Республика күніне ұлттық мереке мәртебесі қайтарылып, бостандық пен еркіндіктің бастауы болған айтулы датаны барша халық қуана тойлауда.
Сын сағаттарда сүрінбей, еңсесін тік ұстай білген еліміздің жеңісті сәттерінен сөз саптаған шаһар басшысы Ұлттық мереке – Республика күніне Шымкент қаласының да зор жетістіктермен жеткенін қысқа-нұсқа баяндап берді.
- Қаланың республикалық мәртебеге ие болуы инвестициялық белсенділіктің артуына септігін тигізді. Үшінші мегаполиске соңғы 5 жылда 1,8 триллион теңге, ал биылғы жылдың 9 айында 327,9 миллиард теңге инвестиция тартылды. Бұл былтырғымен салыстырғанда 20%-ға жоғары. Жыл соңына дейін инвестиция көлемін 530 миллиардқа жеткізуді жоспарлаудамыз, ол үшін нақты қадамдар жасалған-деді М.Әйтенов.
М. Дүйсенбекұлының айтуынша, қала экономикасы қарқынды дамып жатқан соң, соңғы 3-4 жылда инфрақұрылым мәселесі де шешімін тауып келеді.
Ауыз сумен қамтуда 32 нысан, электрмен қамтуда 28 нысан, газбен қамтуда 21 нысан құрылысы жүргізілді. Нәтижесінде, ауыз сумен қамту 93%-дан 98%-ға, электрмен қамту 91%-дан 97%-ға, тұрғындарға табиғи газ жеткізу 92%-дан 93%-ға өсті.
Инженерлік инфрақұрылым мәселесінің бір бөлігі 2023 жылы, ал 2025 жылы барлығы толық шешіледі.
“Осы және бұдан басқа да айтуға тұрарлық жетістіктеріміз бар. Бірақ бізге мұнымен тоқмейілсуге болмайды”-деген қала басшысы Шым шаһардың дамуы мен өркендеуі жолында аянбай еңбек етіп, тер төккен азаматтардың бірпарасын сахна төрінде марапаттап, құттықтады.
Соңы Ж.Жексен, Б.Исаев сынды елге танымал эстрада жұлдыздарының қатысуымен концерттік бағдарламаға ұласты.
ТҮРКІСТАНДА РЕСПУБЛИКА КҮНІНЕ ОРАЙ «ЖАСА, ЖАЙНА ҚАЗАҚСТАН!» МЕРЕКЕЛІК ІС-ШАРАСЫ ӨТТІ
Түркістанда 25 қазан – Республика күні мерекесіне орай «Жаса, жайна Қазақстан!» салтанатты іс-шарасы ұйымдастырылды. «Қыран елім – Қазақстан» хореографиялық - сазды театрландырылған қойылыммен ашылған мерекелік кеште ұлттық мерекенің мән-мазмұны жан-жақты айшықталды. Түркістан облысының әкімі Дархан Сатыбалды көпшілікті Республика күнімен құттықтап, тәуелсіздіктің баға жетпес құндылық екенін айтты.
– Баршаңызды Республика күні мерекесімен шын жүректен құттықтаймын. Бұл мерекенің мәні айрықша. Мемлекет басшысы Қасым-Жомарт Тоқаев Ұлытауда өткен бірінші құрылтайда Республика күніне ұлттық мереке мәртебесін қайтаруды ұсынды. Биыл, 25 қазан – ұлттық мерекеге айналып, Республика күні болып бекітілді. Әлемде тілі, діні, мәдениеті бар болса да, тәуелсіздік ала алмай жүрген ұлттар көп. Бұл ретте басқа қонған бақты бағалаған жөн. Қазақстан Республикасының тұрақтылығын сақтау, дамыту – баршамыздың міндетіміз. Мызғымас бірлік пен ізгі тірлігіміз арқылы Жаңа Қазақстанды дамытуға атсалыса берейік. Түркістанымыз түрленіп, Қазақстанымыз гүлдене берсін! – деген Дархан Сатыбалды елді дамытуға үлес қосқан бір топ азаматқа мемлекеттік марапаттарды тапсырды.
Атап айтсақ, Түркістан өңірінің еңбегімен дараланған азаматтарына «Парасат», «Құрмет», ІІІ дәрежелі «Еңбек Даңқы» ордендері ұсынылды. Сонымен бірге «Ерен еңбегі үшін», «Ерлігі үшін», «Шапағат» медалдары мен Құрмет Грамоталары да өз иелерін тапты.
Республика күніне арналған салтанатты жиында облыс әкімі өңірде атқарылған жұмыстарға тоқталып, алдағы жоспарларды да баяндады.
– Тәуелсіздігіміздің арқасында еліміз өркендеп, тарихымыз дәріптелді. Соның бір дәлелі – Түркістан облысының құрылуы. Түркістан қаласының тарихи рөліне мән беріліп, рухани орталыққа айналды. 4 жылда облыстың әлеуметтік-экономикалық даму қарқыны арта түсті. 2018 жылмен салыстырғанда жалпы өңірлік өнім 1,6 есеге артып, көлемі 2 трлн. 796 млрд. теңгені құрады. Биыл оны 3 трлн. теңгеге жеткізуді көздеп отырмыз. Алдағы уақытта бағдарымызды өзгертіп, күшті облыстың өнеркәсіп әлеуетін дамытуға бағыттауымыз қажет. Бүгінгі таңда облыс үшін маңызды бірнеше ірі жобаны іске асыру жоспарлануда. Жалпы облыста өнеркәсіпті дамытуға барлық мүмкіндіктер бар. Аудан, қалаларда индустриалды аймақтар ашылған. Сонымен қатар өңірге инвесторлар тарту мақсатында Түркістан қаласы аумағында «Turkistan» арнайы экономикалық аймағы құрылған. Осыған байланысты жергілікті бизнес өкілдерін жаңа жұмыс және өндіріс орындарын ашуға атсалысуға шақырамын. Біз тиісті жер учаскесін бөліп, қажетті инфрақұрылымды тартуға және басқа да жеңілдіктермен қолдау көрсетуге дайынбыз, – деді Дархан Сатыбалды.
«Конгресс холл» кешенінің заманауи концерт залында өткен мерекелік кеште облыстың танымал өнерпаздары отаншылдық бағыттағы әндерді шырқап, бишілер өз өнерлерімен көрермендерді серпілтті. Тәуелсіздік, Отан, бірлік, отаншылдық ұғымдары ән мен жырға арқау етіліп, ұлттық аспаптардан рухты оятатын күй төгілді.
Жалпы Республика күніне орай Түркістанда 1200-ден астам іс-шара өткізу жоспарланған. Бүгінде басым бөлігі өтіліп үлгерген.
ТҮРКІСТАНДЫҚТАР ТУҒАН ҚАЛАСЫН ЖЫРҒА ҚОСТЫ
Түркістан қалалық мәдениет үйінің ұйымдастыруымен «Неге маған жырламасқа киелі туған қаламды» жыр кеші өтті.
Республика күніне арналған әдеби кеште ақын Әйгерім Жұмабай, Ақмарал Ғаниқызы және өзбек ақыны Мухаббат Аматаева жүрекжарды өлеңдерін паш етті.
Сонымен қатар, «Түркістан» газетінің редакция меңгерушісі Ләззат Сарыбаева әкесі, ақиық ақын Қаныбек Сарыбаевтың өлеңдерін оқыды. Сондай-ақ, Тұрар Тілеулиев, Исламхан Мұхамедхан секілді айтыскер ақындар да жырдан шашу шашып, көрермендерге көтеріңкі көңіл күй сыйлады.
Одан бөлек, кеш барысында қалалық мәдениет үйінің әншілері Майгүл Тұрыскелдиева және Қожахмет Аманбаевтың орындауларында әсем де, әуезді әндер шырқалды.
Жергілікті танымал ақын-жазушылардың қатысуымен өткен іс шараға қалалық әжелер алқасының мүшелері Ханымкүл Ахметова, Жұмакүл Утегенова, Қызайша Саяғарова, Қарлығаш Сейтжапбарова, Фатима Искакова қатысып, жас дарындарға ақ батасын берді.
Көпшілікке рухани демалыс сыйлаған кеш соңында қалалық мәдениет үйінің директоры Лиза Шамет қонақтар мен қатысушыларға алғыс білдіріп, кеш қонақтарына сый-сияпаттар табыстады.
Түркістан: «Өз елім менің - өзегім менің!» атты мерекелік іс-шара өтті
Түркістан қаласындағы химия-биология бағытындағы Назарбаев Зияткерлік мектебінде «Республика күнінің» жаңа ұлттық мереке ретінде қоғамдағы тарихи мәртебесін көтеру мақсатында жатақхана тәрбиешілерінің ұйымдастыруымен «Өз елім менің - өзегім менің!» атты мерекелік іс-шара өтті.
Салтанатты кешті оқушылар «Көлеңкелі театр» желісі негізінде «Тәуелсіздік баспалдағы» атты қойылымнан бастады. Қойылым ызғарлы «Желтоқсан оқиғасынан» бастау алып, өтпелі кезең қиыншылықтарына төтеп берген қазақ елінің жай - күйін көрсетті. Сондай-ақ, тәуелсіздік жетістіктері кезең-кезеңімен көрсетілді.
Оқушылар түрлі аспаптарда ойнап, патриоттық әндерімен көрермендердің көңілін көтерді. Домбыраның құлағында ойнаған қыздар Құрманғазының күйлерін тартып, құлақ құрышын қандырды.
Жас ақындарымыз тәуелсіз елдің тарихын өз өлеңдеріне қосып, бояуы кеуіп үлгермеген жырларын шашу етті. Директордың тәрбие ісі жөніндегі орынбасары М.С.Бейсенова ұстаздар мен оқушыларды атаулы мерекемен құттықтап, Қазақстанды болашаққа бастап барар жалынды жастар, зияткер оқушылар екенін тілге тиек етті.
Түркістан: Республика күніне орай кітап көрмесі өтті
Түркістан қаласында орын тепккен Халықаралық қазақ-түрік университетінің кітапханасында 25 қазан – Республика күніне орай кітап көрмесі өткізілді.
Көрменің мақсаты – Тәуелсіз Қазақстанның егемендік алғаннан кейінгі қалыптасу тарихымен таныстыру, сондай-ақ еліміздің қоғамдық-саяси, экономикалық, әлеуметтік және рухани өміріндегі оң өзгерістерді кеңінен насихаттау, қоғам алдындағы жоғары жауапкершілік, патриотизм мен Қазақстан азаматтарының бірлігін көрсету.
Іс-шараға кітапхана ұжымы мен студенттер қатысты. Көрмені тамашалауға келген студенттер тек қана кітаптармен танысып қана қоймай, Республика күнінің маңызы туралы да ақпарат алды.
ТҮРКІСТАН: ГРУЗИЯЛЫҚ ТАТИЯ КОБАЛАДЗЕ ХАЛЫҚАРАЛЫҚ «VOICE OF TURAN» ҚАЗАҚ ӘНДЕРІ БАЙҚАУЫНЫҢ ГРАН-ПРИ ИЕГЕРІ АТАНДЫ
Түркістан төрінде Түркістан облысы әкімдігінің және облыстық мәдениет басқармасының ұйымдастыруымен Ұлттық мерекеміз – Республика күніне орай 19-20 қазан күндері халықаралық «Voice of turan» қазақ әндері байқауы өтті.
Екі күні бойы әлем елдерінен келген қатысушылар қазақ әндерін шырқап, өз өнерлерін ортаға салды. Ашылу салтанатына ТҮРКСОЙ халықаралық ұйымының бас хатшысы Сұлтан Раев, Түркістан облысы әкімінің орынбасары Сәкен Қалқаманов, сонымен қатар еліміздің танымал жұлдыздары мен зиялы қауым өкілдері қатысты.
Ұлы Тұран даласын әнмен тербеген Халықаралық байқаудың бірінші күні шартараптан келген қатысушылар елімізге танымал эстрада әншілерімен бірге қазақ әндерін шырқап, көрерменге көтеріңкі көңіл күй сыйлады. Екінші күні қатысушылар алдымен Шәмші Қалдаяқовтың «Арыс жағасында» әнін бірге орындады. Содан соң байқау талабы бойынша қазақтың танымал әндерін орындап, қазылар алқасының бағасын алды. Әділ қазылар құрамында композитор, ҚР Мемлекеттік сыйлығының лауреаты Төлеген Мұхамеджанов (қазылар алқасы төрағасы), әнші, ҚР Мемлекеттік сыйлығының лауреаты, Қазақстанның, Татарстанның Халық әртісі «Құрмет» орденінің иегері Нұржамал Үсенбаева, әнші, композитор, продюсер, ҚР Еңбек сіңірген қайраткері, Халықаралық ән байқауларының жүлдегері Медеу Арынбаев, әнші, композитор, ҚР Еңбек сіңірген қайраткері Маржан Арапбаева, әнші, ҚР Еңбек сіңірген қайраткері, композитор, Халықаралық ән байқауларының жүлдегері Жанар Дұғалова, дәстүрлі әнші, ҚР Мәдениет қайраткері, Айгүл Қосанова, композитор, ҚР Мәдениет қайраткері Бекжігіт Сердәлі бар.
Қазылар алқасы шешімімен Грузия елінен келген Татия Кобаладзе Гран-при иегері атанды. Ал 1-орын Татарстаннан Ильгиз Шайхразиевқа бұйырды. Жүлделі 2-орынды Сербия елінен Стефан Здравкович пен Польша әншісі Михал Качмарек иеленді. Ал 3-орын иегері Черногориядан Катарина Богичевич, Болгария мемлекетінен Христиана Данкова, Өзбекстан Республикасынан Навруза Махамаджанова атанды. Түркиядан Сонгул Екан, Беларусь елінің қатысушысы Егор Шаранков және Қарашай-Шеркессиядан Мариана Алботова халықаралық байқау дипломанты атанды. Үздік оранжировка үшін Грузия елінен келген Татия Кобаладзе мен Польша әншісі Михал Качмарек марапатталды. Барлық жеңімпазға арнайы дипломдар мен қаржылай сыйлықтар, ал Гран-при иегеріне арнайы статуэтка табысталды.
Айта кетейік, бұған дейін аталмыш байқау 2 рет онлайн түрде өткен болатын. 2020 жылы Молдова республикасынан Галина Шкода бас жүлдені жеңіп алса, 2021 жылы Бурятиялық Цыден Еши Бимбаев Гран-при иегері атанған. Жобаның бас продюссері – Мейіржан Алиакбаров. Халықаралық ән сайының нәтижесінде 4 елдің үздік әншілерінен құрылған «Turan Boys» квартеті байқаудың жабылу салтанатында ән шырқады. Бүгінде олар қазақ әндерін насихаттауда зор үлес қосып жүр.
Отырарда «Жүйріктердің жұлдызын жаққан ұстаз» атты іс-шара өтті
Отырар ауданының орталығы Шәуілдір ауылында орналасқан аудандық мәдениет сарайында 25-қазан Республика күні мерекесіне орай «Жүйріктердің жұлдызын жаққан ұстаз» атты іс–шара болып өтті.