Бүгін Өзбекәлі Жәнібеков атындағы Оңтүстік Қазақстан педагогикалық университеті шаңырағында халықаралық «Алаш» сыйлығының лауреаты, «Парасат» орденінің иегері, ақын Ханбибі Есенқарақызының «Сөзі сара, жолы дара Ханапа» атты рухани кеш өтті.

Отырар ауданы әкімінің міндетін атқарушы Сейтжанов Жансұлтан Әділжанұлы Отырар, Талапты ауыл округтерінде болып, ауыл тұрғындарымен кездесті. Кездесуде өткен жылдың қорытындысымен ауданның әлеуметтік-экономикалық дамуы туралы баяндап, алдағы уақытта ауылдарды дамыту бағытында атқарылатын жұмыстар туралы айтып өтті.

Өткен жылы іске асқан ауқымды жұмыстар ағымдағы жылы да жалғасын табады деп күтілуде. Атап айтқанда, аудандағы Ақтөбе, М.Шойманов елді мекендерінде 150 орындық мәдениет үйінің құрылысы жүруде. Аталған нысандар 2024 жылы пайдалануға берілмек. Сондай-ақ, ұлттық қор қаражаты есебінен Талапты елді мекеніндегі жаңа тұрғын үй алабына инженерлік-коммуникациялық желілер құрылысы жүргізілетін болады.

Мұнан бөлек жергілікті бюджет қаражаты есебінен Отырар ауыл округі, Арыс елді мекеніндегі «Парасат», Қ.Толбасиев, К.Қарабеков, Қорқыт ата, Талапты ауыл округі, Көкмардан елді мекеніндегі «Бейбітшілік», Шытты елді мекеніндегі «Ынтымақ» көшелерін жөндеу жұмыстары жүргізіледі.

Халық денсаулығын жақсарту мақсатында «Ауылда денсаулық сақтауды жаңғырту» Ұлттық пилоттық жобасы аясында 2024 жылға аудан бойынша емдеу мекемелеріне жаңа құрылыс қажет ететін 2 нысан енгізіліп отыр. 2023 жылы облыстық құрылыс басқармасы тарапынан «Аққұм» дәрігерлік амбулаториясы мен «Шытты» фельдшерлік - акушерлік тіректің жобалау-сметалық құжаттамалары әзірленіп, құрылыстарын жүргізу үшін бюджетке ұсынылған. Аталған жобалар іске асқан жағдайда аудан орталығынан қашықта орналасқан елді мекендердегі 3175 адам сапалы медициналық қызметпен қамтамасыз етіліп, халықтың қолайлы өмір сүру сапасы артпақ.

Кездесу барысында ауыл тұрғындары ішкі жолдарды жөндеу, аяқжол салу, жарықтандыру мәселелері бойынша көкейде жүрген сауалдарын қойып, жауапты мамандар тарапынан тұщымды жауаптар алды. Жиыннан соң Жансұлтан Әділжанұлы тұрғындарды жеке мәселелері бойынша қабылдап, қабылдауда көтерілген мәселелерге заң аясында нақты жауаптар берді.

Бүгіндері Түркістан облысында мәдениет саласын дамытудың тұжырымдамасы әзірленіп, негізгі бағыттары айқындалған. Таяуда ғана облыс әкімі Дархан Сатыбалдының төрағалығымен өткен жиында осы мәдениет саласындағы жоспарлар талқыланған болатын. Өңір басшысы өңірдің рухани және мәдени әлеуетін көтеру, өнер саласында Түркістанның өз брендін қалыптастыру жөнінде нақты міндеттер жүктеді.

– Киелі қаланың, облыстың брендін жан-жақты қалыптастыруымыз керек. Әсіресе, мәдениет саласында өз бренді болғаны дұрыс. Біздің бишілеріміз де, әншілер мен ансамбльдеріміз де өзімізден шығатын әрі жергілікті екенін білдіріп тұратын сәнді киіммен өнер көрсетулері керек. Таланттарды іздеңіздер, конкурс ұйымдастырыңыздар. Өткізетін мәдени іс-шараларымыз республикалық, халықаралық деңгейде болуы қажет. Мәдениеттің барлық бағытын дамыту жұмысын жандандырыңыздар. Жауапты басқарма болғасын, аудан, қалалардың да мәдениетін жандарыңыздар. Мәдениет үйлері тек жиналыс өткізетін орынға айналмасын. Әрбір ауданның өзіндік тіршілігі болғаны сияқты, қайталанбас мәдениет бағдарламасы да болуы тиіс. Олардың заманауи бағытта жұмыс істеуін қадағалаңыздар. Сонымен қатар кітапхана пунктерін ашуды көбейтіңіздер. Кітап оқу мәдениетін қалыптастыру қажет. Қазір жас режиссерлар аз қаржыға жақсы сериалдар түсіріп жатыр. Туындылары орталық Азия елдерінде таралуда. Солармен байланыс орнатып, Түркістанды насихаттайтын жобаларды жасау керек. Креативті индустрияны дамыту – уақыт талабы, – деген Дархан Сатыбалды басқарма басшысы мен аудан, қала әкімдеріне тапсырмалар берген болатын.

Түркістан облысы мәдениет және туризм басқармасының басшысы Әзімхан Қойлыбаевтың айтуынша, креативті индустрия аймағын құру жұмыстары қолға алынуда. Биыл мәдениет саласын дамытудың негізгі 6 бағыты бойынша жоспарлар дайындалған. Түркістан қаласының монументті өнер туындыларының орнатылуы туралы тұжырымдама дайындалды. Соңғы 3 жылда орнатылған монументті өнер туындыларына мониторинг жұмыстары жүргізіліп, 17 заңсыз орнатылған монумент заңдастырылды.

Биыл ЮНЕСКО-ның халықаралық тізіміне енгізу мақсатында «Арпаөзен» тарихи-мәдени кешеніне археологиялық зерттеу жұмыстары жүргізілді. Зерттеу нәтижесінде 5000-нан астам петроглиф сыры ашылып, халықаралық тізімге енгізу бойынша ұсыныс жолданады. Қазіргі таңда петроглифтердің есеп карточкалары, ғылыми сараптамалары дайындалып, жаңадан тарихи-мәдени мұра нысандары анықталды. Биыл аталған петроглифтерге зерттеу жұмыстарының екінші кезеңі жүзеге асырылмақ. Облыстағы алдын ала есепке алу тізімінде тұрған жергілікті 100 тарихи-мәдени мұра обьектілеріне ғылыми сараптама жүргізіледі.

2023 жылы «Ауыл ел – бесігі» бағдарламасы аясында 13 мәдениет үйін (кітапханасымен бірге) пайдалануға берілді. Биыл мемлекеттік шығармашылық тапсырыс аясында өнім беруші үйірмелер арасында тұңғыш рет облыстық өнер байқауы ұйымдастырылмақ. «TURKIsTANYM» жобасы аясында өңірдегі киелі орындар мен Түркістан қаласындағы ерекше орындар туралы танымдық роликтер түсіріліп, әлеуметтік желілер арқылы насихатталуда. Ауылдарда отандық киноларды насихаттау бойынша тұрақты түрде кинокөрсетілімдер ұйымдастырылған. Сондай-ақ кітап оқитын оқырмандар санын арттыру, халық мәдениетін көтеру мақсатында бірқатар ауқымды жобалар ұйымдастырылды.

Биыл тұңғыш рет республикалық деңгейде жаңа термелер байқауын ұйымдастыру жоспарлануда. Сонымен қатар республикалық деңгейде атап өтілетін тұлғалардың мерейтойларын атқару бағытындағы шаралардың жоспары әзірленуде.

Облыстағы өнер мекемелеріне қосымша штаттық бірліктер беріліп, кәсіби мамандар тұрақты жұмысқа тартылды. «Конгресс холл» көпсалалы кешенінде «Jana Lep» өнер ұжымы қалыптасты. «Құстар қайтып келеді» мюзиклі сахналанып, өнер майталмандары мен көрермендердің ыстық ықыласына бөленді. Аталған ұжым аудан, қалалардан бөлек, көрші облыстарда да өнер көрсетпек.

Облыста әлемге белгілі көркемөнер ұжымдары мен орындаушылардың, театрлардың гастрольдерін, сондай-ақ ірі шетел музейлерінің көрмелерін ұйымдастыру көзделуде. Облыстық «Балтаңдай», республикалық «Түркістан дауысы» дәстүрлі форматта өткізіледі. Халықаралық «Voice of Turan» байқауы биыл ерекше форматта өтеді деп жоспарлануда.

Жалпы Мәдениет саласындағы инфрақұрылым тәуелсіздік жылдарынан бергі уақытта қарқынды дамып келеді. Бұл бағыттағы жұмыстар «Ұлттық рухани жаңғыру» ұлттық жобасы аясында тың серпіліс алды. Аталған стратегиялық құжатта 2025 жылға дейін елімізде 1 500 мәдениет нысанының құрылысы мен жөндеу жұмыстары жоспарланған. Былтыр ғана республикада 22 нысанның құрылысы мен 287 объектіге жөндеу жұмыстары жүргізілді. Биылғы жоспар бойынша 40 объектінің құрылысы мен 260 нысанға жөндеу жұмыстарын жүргізілуі тиіс. 

«AQ-QARA.KZ» - ақпарат