Түркілер төрі саналатын рухани шаһардың білім ордасында «Түркі дүниесінің келешек келбеті – 2040» атты халықаралық семинар өтіп жатыр. Маңызды жиын аясында түрлі тақырыптарды қамтитын пленарлық отырыстар өтуде. Аталған шараға түркі мемлекеттерінен келген өкілдер мен оқытушылар және білімгер жастар қатысты.

Түркі әлемінің экономикалық мәселелерін талқылап, түрлі ұсыныстар айтылған пленералық отырыста маңызды дүниелер ортаға салынды. Онда Түркия, Әзірбайжан, Қырғызстан мен Қазақстан өкілдері өз елдерінің экономикалық жағдайларын айтып, отырыс тақырыбына сәйкес ұсыныстарын жеткізді.
Мәселен, елдегі мұнай бағасының әр өңірде әртүрлі бағада қойылуы бойынша баяндама жасаған оқытушымыз Сәбит Баймағанбетовтың сөзін, доктор, профессор Али Рыза Гөкбунар қуаттап, алдағы уақытта қара алтын арқылы түркі мемлекеттеріне бірегей дәліз қажеттігін айтты.
Сонымен қатар, Түркі мемлекеттері арасындағы білім деңгейі мен өзара ынтымақтастық жайында баяндама жасаған Қырғызстандық өкіл доктор, профессор Сейіл Нажимудинова QS рейтингісі бойынша Түркия алғашқы орынды иеленсе, екінші орында Қазақстан екендігін айтты. Егер осылай бірігіп, тәжірибе алмасу мен ортақ құндылықтарды жүзеге асыратын болсақ түркі мемлекеттері арасындағы білім деңгейі көш бастайтын болады деді.
Экономика саласын талқылаған пленарлық отырыста айтылған маңызды ұсыныстың бірі-ортақ қаржы институттарын құру және қауіпсіздікті күшейту, яғни қорғаныс саласын жетілдіру.
Осылайша ілкімді дүниелер сөз болған алқалы отырыста бауырлас елдердің экономикалық байланыстарын нығайту, қаржы институттарын, көлік-транзит саласын жетілдіру, су-ресурстарын тиімді пайдалану, білім беру ісінде ынтымақтастықты нығайту сияқты маңызды бағыттар талқыланды.
Айта кетейік, халықаралық семинарда талқыланған, қаралған баяндамалар мен ұсыныстар 2022 жылдың 11 қараша күні Самарқан қаласында өтетін Түркі тілдес мемлекеттері ұйымының саммитіне ұсынылатын болады.

Республика күні мерекесі қарсаңында Мемлекет басшысының тапсырмасы және қолдауымен Шымкентте елімізде ғана емес, Орталық Азияда баламасы жоқ алюминий банкаларын шығаратын ірі кәсіпорын іске қосылды.

Өндіріс ошағының ашылуына ҚР Индустрия және инфрақұрылымдық даму министрі Қайырбек Өскенбаев пен қала әкімі Мұрат Әйтенов қатысып, лентасын қиды.

«QAZALPACK» компаниясы - Шымкентте сусын түрлерін өндіруші саланың қарқынды дамуына зор септігін тигізетін, жоғары стандартқа сай жасалған ең озық үлгідегі заманауи өндіріс ошағы. «Оңтүстік» индустриялық аймақта орналасқан бірегей жобаның аумағы 20 000 шаршы метрді құрайды. Қуаттылығы жылына 600 млн альюминий банка шығаруға негізделген. Өнімдерімен Қазақстан нарығын қамтып қана қоймай, экспортқа шығаруға қауқарлы.

Алюминий экологияға зиянсыз, пайдасы – мұндай құтыны бір емес, бірнеше рет өңдеп өндірістен қайта шығаруға және оны қайтадан пайдалануға болады.

Министр аталған жобаның маңыздылығына назар аударып, үшінші мегаполис экономикасын өркендетуде осындай өндіріс орындарының үлес салмағы басым болуы қажеттігін айтып өтті.

Ал өз кезегінде қала басшысы М.Әйтенов Шымкентте мемлекеттік қолдаудың арқасында жыл санап жаңа өндіріс орындары артып отырғанын алға тартты. “Бүгін Орталық Азиядағы алюминий банкалар шығаратын алғашқы зауыттың құрылысы аяқталды. Өз кезегінде жаңа тың жобаны іске асырған компания ұжымын құттықтаймын!

Біз еліміздегі үшінші мегаполистің экономикасына ауқымды инвестиция тартумен қатар, жоғары стандарттарға сай келетін өндірісті дамытып, импорттық үлесті азайту бағытында жұмыс істейтін боламыз”,-деді ол.

Айтып өтейік, жоба аясында газдалған және газдалмаған, төмен алкогольді және алкогольсіз сусындарды құюға арналған әртүрлі көлемдегі, оңай ашылатын қақпағы бар алюминий банкаларын шығару жоспарланған. Алғашқы қадамдар жасалынды. Енді зауыт басшылығы 145 адамды тұрақты жұмыспен қамтимыз деп отыр.