Жексенбі, 01 Қараша 2026 20:16

Шымкент: Басқарма төрағасының кеңесшісі медицина қауымдастығы өкілдерімен кездесті

«Әлеуметтік медициналық сақтандыру қоры» КЕАҚ басқарма төрағасының кеңесшісі Айгерім Сеитова Шымкент қаласына жасаған жұмыс сапары аясында қалалық денсаулық сақтау басқармасының басшылығымен және медицина қауымдастығының өкілдерімен кездесу өткізді. 

Жұмыс кездесуі барысында міндетті әлеуметтік медициналық сақтандыру (МӘМС) жүйесінің қазіргі жағдайы, оны одан әрі дамыту және жетілдіру бағыттары кеңінен талқыланды. Сонымен қатар медициналық ұйымдарды қаржыландыру мәселелері, тұрғындарға көрсетілетін медициналық көмектің қолжетімділігі мен сапасын арттыру, денсаулық сақтау саласындағы өзекті түйткілдер және медициналық ұйымдардың кредиторлық берешегіне қатысты мәселелерге ерекше назар аударылды.

Кездесу барысында тараптар медициналық қызмет көрсету саласында кездесетін бірқатар мәселелерді ортаға салып, оларды шешудің тиімді жолдары жөнінде пікір алмасты. Әсіресе медициналық ұйымдардың тұрақты жұмыс істеуіне қажетті қаржыландыру тетіктері, көрсетілетін қызметтердің сапасын арттыру және медициналық көмектің үздіксіздігін қамтамасыз ету мәселелері сөз болды.

Бұдан бөлек, медициналық ұйымдардың басшыларымен өткен кездесуде пациенттердің медициналық көмекке уақытылы әрі кедергісіз қол жеткізуі, медициналық қызметтердің үздіксіз көрсетілуі және денсаулық сақтау ұйымдарының жұмыс тиімділігін арттыру мәселелері қарастырылды. Сондай-ақ саладағы кадрлық әлеуетті нығайту, білікті мамандарды сақтау, медицина қызметкерлерінің еңбек жағдайларын жақсарту және олардың кәсіби қызметіне қолайлы жағдай жасау мәселелері де назардан тыс қалмады.

Айта кетейік, қазіргі таңда «Әлеуметтік медициналық сақтандыру қоры» КЕАҚ-ның Шымкент қаласы бойынша филиалы 174 медициналық ұйыммен келісімшарт негізінде жұмыс жүргізуде. Оның ішінде 34-і мемлекеттік, ал 140-ы жекеменшік медициналық ұйымдар болып табылады. Бұл қаладағы медициналық қызмет көрсету жүйесінде мемлекеттік ұйымдармен қатар жекеменшік сектордың да маңызды рөл атқаратынын көрсетеді.

Сонымен қатар бүгінгі таңда Шымкент қаласы тұрғындарының 84,4 пайызы міндетті әлеуметтік медициналық сақтандыру жүйесінде сақтандырылған. Бұл көрсеткіш қала халқының басым бөлігінің МӘМС аясында медициналық көмек алу мүмкіндігі бар екенін аңғартады.

Жұмыс сапары аясындағы кездесудің негізгі мақсаты – денсаулық сақтау саласындағы өзекті мәселелерді бірлесіп талқылау, медициналық ұйымдар мен Қор арасындағы өзара байланысты нығайту және МӘМС жүйесінің тиімділігін арттыруға бағытталған ұсыныстарды қарастыру.

Мұндай кездесулер медициналық ұйымдардың жұмыс барысында туындайтын мәселелерді ашық талқылауға, сала өкілдерінің пікірлері мен ұсыныстарын ескеруге, сондай-ақ тұрғындарға көрсетілетін медициналық көмектің сапасы мен қолжетімділігін арттыруға мүмкіндік береді.

 

 

Оқылды 14 рет