«Күміс қалам 2023». Шымкентте  республикалық жас ақындар мүшайрасы өтті.  Оған еліміздің түпкір-түпкірінен қаламы ұшқыр 16 жас жазба ақыны қатысты.  Шара Шымкент қаласы ішкі саясат және жастар істері жөніндегі басқармасының Жастар ресурстық орталығының ұйымдастыруымен 25-қазан – Республика күніне орай орайластырылды. Үшінші рет ұйымдастырылып отырған поэзиялық кеш - жастардың ынтасын арттырып, ақындардың шабытын ашуға зор мүмкіндік береді.

Кешті ашып беруге Шымкент қаласы әкімінің бірінші орынбасары Қуаныш Асылов арнайы келіп, барша қазақстандықтарды Республика күнімен құттықтап, үлкен додада бақ сынасқалы келген жас қаламгерлерге сәттілік тіледі.

Осымен үшінші рет өткізіліп отырған жас ақындар  мүшайрасы - Шымкент қалалық жастар ресурстық орталығының төл жобасы. Мақсат жас жазба ақындарын қолдап, оларды халықаралық жыр додаларына қосу дейді ұйымдастырушылар.

Бекітілген кестеге сәйкес 14 пен 35 жасқа дейінгі жастар қатарынан іріктеу кезеңіне 16 жас ақын жолдама алған. Олар 4 кезең бойынша бақ сынады.

I орын “Күміс қалам-2023” жас ақындар мүшәйрасының иегері Ұлытау облысынан Айзада Рахымжан, II орынды Жадыра Байбуланова, III орынды Серғазы Қайырболды иеленді.

Іс шараның екінші бөлімі «Күміс домбыра» жас айтыскерлер додасы. Жыр додасына еліміздің әр өңірінен жиналған 16 айтыскер ақын қатысты. Тәуелсіздікті тірек еткен жыр додасына белгілі айтыскер ақындар мен мәдениет саласының мамандары әділ бағасын беріп, қазылық етуде. Атап өтсек, айтыстың ақтаңгері атанған Бекарыс Шойбеков, Маржан Есжанова, Күлия Айдарбекова, Ахметжан Өзбеков, Еркебұлан Қайназаров сынды азаматтар қазылар алқасы құрамында болды.

Жыр додасында жас ақындар қоғамдағы өзекті тақырыптарды қозғап, көрерменді ұшқыр ой, ұрымтал шумақтарымен тамсандырды.

Айтыстың ақтық кезеңіне жолдама алған үш жұп суырып алып, шаппа-шап айтыс көрсетіп, көрермен қауымның қошеметіне бөленді.

Айтыстың жеңімпаздары мен жүлдегерлерін Шымкент қаласы әкімінің бірінші орынбасары Қуаныш Асылов марапаттап, ұлттық өнерімізді ұлықтап, тамаша айтыс көрсеткен өнерпаздарға алғысын білдірді.

Сонымен, әділқазылар алқасының шешімімен жүлделі ІІІ орынды Ердаулет Ыбырай мен Нұрдаулет Өмірбекке, ІІ орын Жамбыл облысының өкілі Мұхтар Қонарбай мен түркістандық ақын Ахметрасул Баянбайға, ал, І орын Баянауылдан келген Мәрес Байронға берілді. «Күміс қалам» айтысының бас жүлдесін Шымкент қаласының өкілі Аян Ниязбек жеңіп алды.

Шымкент қалалық опера және балет театрында хор ұжымы «Күтемін сені» атты композициялық драманың жаңа форматтағы қойылымын көрерменге паш етті. Сюжеттің негізінде екі басты кейіпкер – Баритон мен Колоратурлық Сопрано арасындағы махаббат хикаясы баяндалды. Қойылымды сахналаған актерлер және театрдың хор ұжымы өнер мен шынайы өмір әлеміндегі нағыз оқиғаны театр сүйер қауымға жеткізіп, ерекше атмосфера сыйлады.

–«Күтем сені» – композициялық драма, классикалық мюзикл. Біз бұл қойылымды жастарға арнап сахналадық. Әрі осы қойылым арқылы Шымкент қалалық опера және балет театрының 15 жылдық тарихын зерделей отырып, театр өнеріндегі еңбегін көрерменге жеткізуге ұмтылдық. Қойылым ерекше жанрда, заманауи стилде сахналанды және халық әндері мен тагымал қазақ композиторларының әндері арқылы көрермендерді керемет әсерге бөлегені сөзсіз, – деді режиссер Шағуан Үмбетқалиев.

Көріністің барысы Баритон мен Колоратурлық Сопраноның жастық шақтағы пәк махабатынан бастау алады. Екеуі қыз-жігіт болып жүргенде махабаттың буына балқыған Баритон үйленуге бел байлайды. Алайда, қалтасында көк тиыны жоқ ол достарынан көмек сұрайды. Қасындағы адал достары бірігіп, кең далада Баритонға той жасап береді. Барлығы тойды мәз-мейрам, шат-шадыман болып өткізеді. Қонақтар тарқасып, қос ғашық оңашада қалып, атқан таңды таудың етегінде қарсы алады. Дүниеге нұрын шашып күн шыққанда қос ғашық алдағы өмірін жоспарлап, армандарынан сыр шертеді.

Күндер зулап, сағаттар сырғып өте берді. Әлі нәресте сүйе алмаған оларға туыстары сөйлей бастайды. Келінге ауыр сөздер айтып, көңіліне қаяу түсіреді, бірақ бір-бірін шын сүйген ғашықтарға бұл кедергісін келтірмейді. Араға жылдар салып Баритонның әйелі ұл табады. Оны жігіттің досы сүйінші сұрап, қуанышын бөлісті.

Нәресте өсіп, бала-бақшаға барар жасқа жетті. Бір күні мектептің де табалдырығын аттады. Бірақ, бұл отбасының өмірі күнделікті күйбең тіршіліктен ары аспады, біріне-бірі ұқсас сүреңсіз күндер қайталана берді, қайталана берді. Жоқшылық та есік қағып, таршылықтың күйін кешті. Махаббат алауы бәсеңдеп, үйде ұрыс-жанжал жиілей түсті. Мұның соңы қос ғашықтың айырылысуына әкеп соқты.

Ғашықтардың таңмен таласа айтқан асыл армандары адыра қалды. Баритон қарлығашын ұясынан ұшырып алып, балапанын қорғай алмаған байғұстың күйін кешті. Бірнеше күннен кейін, баласының ауруханаға түскенін жанында жүрген досы айтты. Жүрегі дүрсілеп, уайым басқан әкесі алды-артына қарамай ауруханаға барып, дәрігерден бөбегінің хәлін сұрайды. Дәрігер жағдайы жақсы екенін айтып, абыржулы әкені сабырға шақырды... Ауруханада әйелін кездестірген Баритон бар өкінішін білдіріп, отбасын сақтай алмағынына қынжылды. Ғашығына қайта қауыар сәтті ұзақ күткенін айтып, отбасынан кешірім сұрап, екеуі қайта қосылады.

Қойылымның әсерлі болғаны сондай көрермен бірде көз жасына ерік берсе, бірде күлкі мен қуанышқа кенелді. Ойлы жанның жүрегіне жол тапқан «Күтемін сені» композициялық драмасы отбасының қадірі мен құндылығын тағы бір мәрте сезіндіріп, баянды баққа жету үшін соқтықпалы, соқпақсыз өмір жолындағы қиындық пен тауқымет атаулыны бірге көтеру керектігін көрерменге ұғындырды.